日前（11月18日）由博愛醫院主辦的《博愛SO ME SHOW MUSIC》頭場在AXA x WONDERLAND安盛 x 竹翠公園隆重舉行，尹光打頭陣出場尖叫聲不斷，當張天賦、魏浚笙、馮允謙現身時樂迷格外興奮。
近日人氣急升的尹光不時被集郵，他表示唱戶外騷特別開心，計劃搞戶外演唱會：「我比較少戶外表演，可以同公司傾吓！我想借呢個機會多謝投我票嘅朋友，心入面已經好開心，我唱咗53年第一次參加叱咤，即使十強止步都唔會失望。」
新晉組合Me&第一次現場演唱，笑言自己值高分：「平時我哋練習都以120分做目標，就係怕現場甩轆！以為自己會好緊張，但原來上到台同觀眾互動，都覺得好爽想再有表演。」被問到最想同公司邊位藝人合作，Me&表示「我哋想同ANSONBEAN、Jay Fung合唱，因為佢哋台風都好型，仲有Joyce，Joyce solo跳唱好犀利，我哋如果可以加入埋相信有新火花。之前Joyce都有透過經理人短訊我哋，佢係好Nice嘅前輩，讚我哋MV跳得好，有大師姐鼓勵自信心都多啲！」
Jay Fung話戶外騷感覺好興奮，大讚觀眾夠晒反應，直言想搞個人戶外演唱會：「我冇失望入唔到十強，因為都冇預期入12強嘅！之前同Fans講如果入到十強會Post『黑圖』，不過依家都會找數，多謝佢地嘅支持。」
魏浚笙一身禮服現身，Fans不停叫Encore氣氛狂熱：「今日係第三次戶外表演，我覺得自己表現淡定咗！今年做咗好多唔同嘅歌，已經盡咗力就可以，冇恨話年尾攞咩獎，現階段出多啲歌先，過幾日就推多一首，拍戲時邀請王菀之新MV有好多CG，但係出碟要十幾隻先可以諗。」
台上洪嘉豪自爆突然氣管敏感，騷前突然呼吸困難，一度考慮辭演：「我之前都試過，但一直都搵唔到致敏原，食完藥好咗啲，但對眼仲未消腫。其實入到12強都覺得自己幾叻喇，寄望下一年做好啲，我最怕Fans唔開心，其實盡咗力就可以。」而陳蕾就話溫度急降，搞到自己「聲沙沙」：「今日綵排都有啲走音，MC就唔介意Fans擺上網，但我就想大家擺最好嘅一段出嚟。」
MC對於隊友演唱會在即，笑言未計劃做嘉賓：「因為我都做過好多次嘉賓，呢個係佢地嘅騷，比佢地自己揸主意啦，如果佢地邀請我都要問吓經理人先，雖然同公司都要問！（叱咤有冇信心？）一定有信心嘅，但唔想比太大壓力Fans，佢地有聽我啲歌就夠。」
《博愛SO ME SHOW MUSIC》11月18-19日舉行，超過共33個表演單位參與演出，音樂會收益撥捐博愛醫院青少年服務，令音樂會別具意義。
